طلبة نيوز-

ا.د. نجيب ابو كركي (*)

عزيزي "اللدود" عصفور حديقتنا، احترمتك وقدرتك من خاطر المرحوم يوسف شاهين اللي حط اسمك على احد افلامه بعد باب الحديد وقبل الاسكندرية ليه ! لكنك مفكر حالك نابليون بونابرت وعليه يؤسفني ان اخبرك بانك زودتها وانك خرقت اتفاق الجنتل بيرد من طرفك ولم تحترم قاعدة الففتي ففتي فيما يخص شجيرة التين وانتاجها وانا مراقبك وشايفك نازللي طس بكل حبة تين تحمر على الشجرة خجلا وانت ولا على بالك طوالي بتشطح وبتفكرها بتغمز فيك ! يا عزيزى مش هيك الاصول اذا بتفهم بالاصول انا من الاردن حضرتك من وين جاينا ؟ مش معقول من فرنسا؟ لانهم هناك ابناء اصول و بحترموا الاتفاقيات والمعاهدات على مستوى الافراد و كل واحد فيهم بحترم كلمته او زقزقته بظن والله العليم انك جاي من رومانيا تخبيت مع شحنة خرفان ووصلت العقبه وولعت من فرق الحرارة فهجيت الى جبال السلط رحبنا فيك و فهمناك الك نص المحصول انت مهاجر واحنا انصار يعني بمعدل حبه كل يومين بس الظاهر انك ضعيف في الرياضيات و ما بتعرف تقسم واحد على اثنين على كل حال سادبرك وافرجيك كيف رايح اطلع من خرجك ساوظف التقنيات الحديثة اركب كاميرات وهمية منظرها بخليك تفكرها انها بعبع وتهرب على الفور "لا تألو" على شئ وراح اركب "شيبس" الكترونية واحده بكل حبة تين وتحدد موقعها بال جي بي اس عشان لما تنقد الحبة يتغير موقعها فاكتشف ذلك اون لاين وكما لما تنقدها اما يوجعك منقارك المتطاول او تزور وتغص بالشيبسات او تضرك الزيوت البايرة اللي بقلوها فيه.. ( هذا خطاب او مذكرة تفاهم ابدي بها حزما تجاه الطير الطاير في حال بدأ موسم التين و ما خلولنا الطيور شي على الشجرة). وعليه احسن انك تحترم حالك وتثبت انك ابن اجواء وطيور زي ما احنا ولاد عالم وناس. نفتح صفحة جديدة..
(*). ا.د. نجيب ابو كركي / استاذ الجيوفيزياء وعلم الزلازل كلية العلوم -الجامعة الاردنية.