#ايمان_عكور

في الوقت اللي معظم الشعب الاردني مش ملاقي خبز يسد جوع اطفاله.. والا غطاء يحميهم من البرد..والا حق دوا يعالج فيه مرضه وقهره وفقره.. والا اسطوانة أكسجين ترجعله النفس المخنوق.. ؟

امانة عمان كانت عايشة باللالا لاند بتفكر outside the box..

في الوقت اللي بلدنا بمر باقسى اوضاع اقتصادية اكلت الأخضر واليابس..وتركت الملايين على هامش الحياة بانتظار الفرج..وصار طول خط الفقر فيها بنفع يدخل موسوعة جينيس..

امانة عمان كانت بلشانة بحدث كبير..كانت بتغرد خارج السرب..لأنها اصلا لا تنتمي للسرب..
في الوقت اللي المواطن المقهور...رغم سكاكين القهر اللي بتنهش فيه..لا يزال يغني بحب الوطن وبرفع علمه عالي وين ما كان..وما بسمح انه هالعلم ينزل الأرض..

امانة عمان ما خجلت على نفسها وهي تتسابق مع دولة الإمارات علشان ترفع اطول علم وتدخل موسوعة جينيس للأرقام القياسية..هدية منها للوطن المنهوب في مئويته..؟

بربكم ما خجلتوا من حالكم..هاي اللي طلع معكم يا عباقرة علشان تحتفلوا بمئوية الأردن..أنكم تخيطوا علم الاردن بطول 2135 متر.. يعني أطول من علم الإمارات ب15 متر..وتتباهوا انكم راح تدخلوا التاريخ بهالانجاز..

والاوقح من هذا كله..ان يتم بهدلة رمز الأردن وعلمه الذي لا نرضى الا ان يرفرف عاليا..بأن يتم مده على طول الشارع استعدادا للاحتفال العظيم ..

لو كنتوا سالتوا اي طفل بالشارع كان أعطاكم مليون فكرة تدخلوا فيها جينيس..
أطول شوارع محفرة خربانة
أسوأ خدمات ..اكثر فساد..
واطول خط فقر
وابطأ باص سريع بالكون...؟

حرام عليكم.. ارحموا البلد..
مصاريف على الكذب بلا اي رقابه لأنها أموال منهوبه على احتفالات ومهرجانات وقصص فارغة .

العلم الاردني يرفرف في قلوبنا مش محتاجين لقصصكم الساذجة حتى تبرهنوا تسحيجكم ..التكلفه مهما كانت ، كان الاولى التبرع بها بإنجاز يفيد الوطن في ظل هذا الظرف الصحي القاهر..
والله لو اشتريتوا كم اسطوانة أكسجين وفردتوهم على الشارع كان كسبتوا شرف الانتماء..وبالناقص عن ابو جينيس..
طبعا مش راح نقلكم رقعوا الشوارع..
احسنلكم...

باختصار..عملتكم السودا..هي قمة الاستفزاز وهي التي تصنف تحت بند زعزعة امن واستقرار البلد ..لما نشوف فلوس دافعي الضرايب بتروح على هيك شغلات تافهة استحوا طلاب المدارس يعملوها..
في الوقت اللي الحاويات اللي بشوارع عمان صارت مليانة بالمواطنين الجوعانين
يا ريت لو كنتوا فكرتوا فيهم..وانتوا بتعملوا عصف ذهني قبل ما تطلعوا بهالانجاز..

صدقوني..عمره ما كان طول العلم او حجمه هو مقياس للانتماء
المهم..ان تحافظ على الوطن وتخدم هذا العلم..؟

نرفض هذه الإهانة لعلم الأردن
وجب عليكم الاعتذار لكل اردني.. ولكل ذرة من تراب الوطن..