TLB News (طلبة نيوز للإعلام الحر)
حديث الاسطوانات
19/02/2014 - 6:30am

طلبة نيوز
احمد حسن الزعبي

من المقرر ، ان تشدّ اسطوانات الغاز الرحال من جديد الى بلدها الأصلي الهند بعد مكوثهن في صالة «ترانزيت المصفاة» أكثر من ثلاثة شهور و»طبشة..
طبعاً نالت هذه الاسطوانات شهرة لم تكن تحلم بها لو بقيت مئة عام في الهند ،أو حتى لو دخلت الخدمة وحملت على أكتاف موزعي الغاز ،و جلست بوسط العائلة في قلب الصوبة ، أو بخزانة المطبخ قرب كيس البصل، فإن أحداً لن يحفل بها ولن تراق نقطة حبر واحدة في سبيلها..
**
برغم ان إعادة الشحنة غير الصالحة يعدّ انتصاراً للمواطن وسلامته ، الا أن ما جرى يعدّ «فقسه» لهذه الاسطوانات وهي عائدة من حيث أتت دون ان تنجح في الحصول على عقد عمل عندنا، أو تمالحنا حتى لو «بطبخة» واحدة ، او «انفجار « بريء يحدث بعض الحروق من الدرجة الثالثة..
في وسط البحر ، والقبطان يحرك تجاه الباخرة على مهل نحو الهند ،و»ربع مليون» جرّة تجرّ أذيال الخيبة و»القشل»،وتكركع بأجسادهن كلما داهمتها موجة قوية ، تخيّلت هذا الحوار بين اسطوانتين هنديتين عائدتين على متن الباخرة:
• الإسطوانة 1: كيف هيك يا غبصة..رقعونا كل هالشهور وما خلونا نفوت!.
• الأسطوانة 2: مشان الله لا تذكريني..هسع بفقع!.
• الأسطوانة1: بعرضك..مش هون تفقعي..بس نصل افقعي زي ما بدك.
• الأسطوانة 2: شو بدنا نقول لأهالينا.؟؟
• الاسطوانة 1: عادي..بنقول لهم ما عجبناش الشغل بالاردن!.
• الأسطوانة 2: فكرك بصدقوا..ما احنا استقتلنا ع الروحة؟!
• الأسطوانة1: لعاد شو نقول لهم..؟؟
• الإسطوانة2: قوليلهم طلع لي شغل بالخليج وبوضع أحسن..وبستنا بالفيزا..كذبة بيضا يعني.
• الأسطوانة1:آخرتنا رح ننكشف... انا رح أقول لهم..انه تحرّش فيه مفتاح الغاز..وقلت كلشي ولا كرامتي..وحجزت على اول باخرة وأجيت

• الاسطوانة2: هسع شو بده يسكّت «جرّة أبوي» ..كل ما اتناقر معها رح تحكيلي: لو فيك خير كان ما رجعوك الأردن..يا مقطّعة وموصلة يا مصدية يا فاضية يا فاشلة بكل المواصفات والمقاييس.
• الأسطوانة 1: سمعت انهم بدهم «يدهنونا» بلون ثاني ويرجعونا!!.
• الاسطوانة 2: من ثمك لباب «المستودع»...يا رب بجاه «هالجلدة والبربيش» تيسّر أمرنا وتوقف بطريقنا «رجال الاعمال» !.
• الاسطوانة1: آآآآخ....بس...غطينا يا كرمة العلي ..صدينا من الرطوبة.

اضف تعليقك

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.
Image CAPTCHA
أدخل الحروف التي تظهر بالصورة (بدون فراغات)